Supreme Court Relief: CEC ज्ञानेश कुमार यांना तूर्तास दिलासा; निलंबनावर अंतरिम आदेश नाही
मुंबई : मुख्य निवडणूक आयुक्त ज्ञानेश कुमार यांना निलंबित करण्याची मागणी करणाऱ्या याचिकेवर सर्वोच्च न्यायालयाने सोमवारी सुनावणी घेतली. या प्रकरणात न्यायालयाने केंद्र सरकार, निवडणूक आयोग तसेच मुख्य निवडणूक आयुक्तांसह अन्य दोन निवडणूक आयुक्तांना नोटीस बजावली आहे. मात्र, ज्ञानेश कुमार यांच्या निलंबनाबाबत कोणताही अंतरिम आदेश देण्यास न्यायालयाने नकार दिला.
याचिकेत निवडणूक आयोगातील अन्य दोन आयुक्तांची संमती न घेता मुख्य निवडणूक आयुक्तांनी काही निर्णय एकतर्फी घेतल्याचा आरोप करण्यात आला आहे. या आरोपांवर न्यायालयाने संबंधितांकडून स्पष्टीकरण मागवले आहे.
सरन्यायाधीश सूर्यकांत यांच्या नेतृत्वाखालील खंडपीठासमोर या प्रकरणाची सुनावणी झाली. निवडणूक आयोगाने संबंधित निर्णय घेताना कायदेशीर प्रक्रिया आणि नियमांचे पालन केले होते का, याची प्रथम तपासणी केली जाईल, असे न्यायालयाने स्पष्ट केले.
नियमांचे पालन न करता कोणताही निर्णय घेतल्याचे आढळल्यास त्या निर्णयाचा फेरविचार किंवा तो रद्द करण्याचा पर्याय खुला असल्याचेही न्यायालयाने नमूद केले.
Form 6 संदर्भातील आरोपांवरही सुनावणीदरम्यान चर्चा झाली. मतदार यादीतील Form 6 मध्ये बदल करण्यास न्यायालयाने कोणतीही परवानगी दिली नव्हती, असे सरन्यायाधीश सूर्यकांत यांनी स्पष्ट केले. संबंधित कागदपत्रे आणि नोंदी न्यायालयासमोर सादर झाल्यानंतर त्यात बदल कोणी केले, याची तपासणी केली जाईल, असे त्यांनी सांगितले.
दरम्यान, सर्वोच्च न्यायालयाने निलंबनाबाबत कोणताही अंतरिम आदेश दिलेला नसल्याने ज्ञानेश कुमार यांना तूर्तास दिलासा मिळाला आहे. मात्र, निवडणूक आयोगाच्या निर्णयप्रक्रियेबाबत उपस्थित करण्यात आलेल्या आरोपांवर केंद्र आणि आयोगाचे उत्तर महत्त्वाचे ठरणार आहे. संबंधित कागदपत्रे आणि नोंदी न्यायालयासमोर आल्यानंतर या प्रकरणातील पुढील दिशा स्पष्ट होईल.
