Drought Relief: ५ हजारांच्या मदतीने काय होणार? जयंत पाटलांची कर्जमाफीची मागणी
सांगली : दुष्काळग्रस्त शेतकऱ्यांना दिवाळीपूर्वी प्रत्येकी ५ हजार रुपये अग्रीम मदत देण्याच्या सरकारच्या निर्णयावर राष्ट्रवादी काँग्रेस (शरदचंद्र पवार) पक्षाचे ज्येष्ठ नेते जयंत पाटील यांनी प्रतिक्रिया दिली आहे. केवळ पाच हजार रुपयांची मदत देऊन शेतकऱ्यांचे आर्थिक संकट दूर होणार नाही. त्यासाठी कर्जमाफीसह ठोस उपाययोजना करण्याची गरज असल्याचे त्यांनी म्हटले आहे.
शासनाने दुष्काळ जाहीर केल्यानंतर शेतकऱ्यांना दिवाळीपूर्वी प्रत्येकी ५ हजार रुपये अग्रीम मदत देण्याचा निर्णय घेतला आहे. मात्र, सध्याची परिस्थिती पाहता शेतकऱ्यांना केवळ अग्रीम मदत देऊन चालणार नाही, तर त्यांना आर्थिक संकटातून बाहेर काढण्यासाठी ठोस उपाययोजना करणे आवश्यक आहे. त्यामुळे दुष्काळ जाहीर केलेल्या सर्व तालुक्यांतील शेतकऱ्यांना कर्जमाफीचा लाभ देण्यात यावा. यंदाच्या खरीप हंगामात घेतलेले पीककर्ज सरसकट माफ करण्यात यावे. तसेच, नियमितपणे कर्जाची परतफेड करणाऱ्या दुष्काळग्रस्त तालुक्यांतील शेतकऱ्यांना प्रत्येकी १ लाख रुपयांचे प्रोत्साहन अनुदान देण्यात यावे जेणेकरून शेतकऱ्यांना दिलासा मिळेल. शेतकऱ्यांना खऱ्या अर्थाने आधार देण्यासाठी राज्य शासनाने पुढाकार घ्यावा, ही विनंती करतो. #दुष्काळ #महाराष्ट्र #शेतकरी_मदत
— Jayant Patil- जयंत पाटील (@Jayant_R_Patil) October 14, 2026
जयंत पाटील यांनी सोशल मीडियावरून सरकारकडे शेतकऱ्यांसाठी काही मागण्या केल्या आहेत. दुष्काळ जाहीर केलेल्या सर्व तालुक्यांतील शेतकऱ्यांना कर्जमाफीचा लाभ द्यावा, अशी त्यांची प्रमुख मागणी आहे.
यंदाच्या खरीप हंगामात शेतकऱ्यांनी घेतलेले पीककर्ज सरसकट माफ करावे, असे पाटील यांनी म्हटले आहे. तसेच नियमितपणे कर्जाची परतफेड करणाऱ्या दुष्काळग्रस्त तालुक्यांतील शेतकऱ्यांना प्रत्येकी एक लाख रुपयांचे प्रोत्साहन अनुदान द्यावे, अशी मागणीही त्यांनी केली.
दुष्काळामुळे शेतकरी आर्थिक अडचणीत सापडले आहेत. अशा परिस्थितीत केवळ तात्पुरती मदत न देता त्यांना आर्थिक संकटातून बाहेर काढण्यासाठी सरकारने ठोस पावले उचलावीत. शेतकऱ्यांना खऱ्या अर्थाने दिलासा देण्यासाठी राज्य सरकारने पुढाकार घ्यावा, असे आवाहन जयंत पाटील यांनी केले आहे.
