International Coffee Day 2026 : आलिया भट्टपासून मृणाल ठाकूरपर्यंत; जाणून घ्या बॉलिवूड कलाकारांच्या कॉफीच्या आवडी!
मुंबई : काहींसाठी कॉफी म्हणजे दिवसाची सुरुवात, तर काहींसाठी दिवसभराच्या धावपळीत मिळणारा निवांत क्षण! बॉलिवूड कलाकारांचं आयुष्य शूटिंग, प्रमोशन, मीटिंग्ज आणि प्रवासाने व्यापलेलं असतं. अशा व्यस्त दिनक्रमात कॉफी अनेक कलाकारांची आवडती सोबती बनली आहे. कुणाला ब्लॅक कॉफी आवडते, तर कुणाला आयस्ड कॉफीची भुरळ आहे. १ ऑक्टोबर रोजी साजऱ्या होणाऱ्या आंतरराष्ट्रीय कॉफी दिनानिमित्त जाणून घेऊया, आपल्या आवडत्या बॉलिवूड कलाकारांच्या कॉफीच्या खास सवयी आणि त्यांच्याशी जोडलेले काही रंजक किस्से.
आलिया भट्ट : ब्लॅक कॉफीपासून वेगवेगळ्या फ्लेवर्सपर्यंत
अभिनेत्री आलिया भट्टला ब्लॅक कॉफी विशेष आवडते. नेहमीच्या कॉफीसोबतच वेगवेगळ्या ठिकाणच्या आणि फ्लेवर्सच्या कॉफीचा आस्वाद घेण्याचीही तिला आवड आहे. लंडनमध्ये असताना तिने एगनॉग लाटे या वेगळ्या प्रकारच्या कॉफीचाही अनुभव घेतला होता. त्यामुळे कॉफी ही तिच्यासाठी केवळ रोजची सवय नसून, नवीन चवी अनुभवण्याची एक संधीदेखील आहे.
कियारा अडवाणी : कॉफीशिवाय दिवसाची सुरुवातच नाही!
कियारा अडवाणीने स्वतःला कॉफी अॅडिक्ट म्हटलं आहे. तिला विशेषतः ब्लॅक कॉफी आवडते. शूटिंग असो, चित्रपटाचं प्रमोशन असो किंवा प्रवास, तिच्या व्यस्त वेळापत्रकात कॉफीला नेहमीच खास स्थान असतं.
वरुण धवन : धावपळीमध्ये कॉफीचा निवांत ब्रेक
अभिनेता वरुण धवनलाही कॉफीची आवड आहे. शूटिंगच्या व्यस्त वेळापत्रकातून मिळालेला छोटासा ब्रेक असो किंवा प्रवासातील निवांत क्षण, कॉफीचा आस्वाद घेणं त्याला आवडतं. कामाच्या धावपळीत स्वतःसाठी थोडा वेळ काढण्याचं निमित्त म्हणजे त्याच्यासाठी कॉफी!
करीना कपूर : कॉफीप्रेमाची जुनीच सवय
करीना कपूरचं कॉफीवरील प्रेम सर्वश्रुत आहे. कामाच्या दरम्यान आवडती कॉफी पिण्यापासून ते प्रवासात वेगवेगळ्या ठिकाणच्या कॉफीचा आस्वाद घेण्यापर्यंत तिची ही आवड कायम दिसून येते. चांगलं खाणं, सुंदर ठिकाणं आणि कुटुंबीय किंवा मित्रांसोबत घालवलेले निवांत क्षण यांचाही तिच्या कॉफीप्रेमाशी खास संबंध आहे.
पुलकित सम्राट : दिवसाची सुरुवात स्ट्राँग ब्लॅक कॉफीने
अभिनेता पुलकित सम्राट आपल्या दिवसाची सुरुवात ब्लॅक कॉफीने करतो. कॉफीनंतर ध्यान आणि व्यायाम हा त्याच्या दिनक्रमाचा भाग आहे. त्याला स्ट्राँग कॉफी आवडते. विशेष म्हणजे कॉफीमध्ये दालचिनीचा हलका फ्लेवर असलेली कॉफीदेखील त्याच्या पसंतीची आहे.
श्रद्धा कपूर : कॉफी शॉपमध्ये केलंय काम!
श्रद्धा कपूरचा कॉफीशी संबंधित किस्सा काहीसा वेगळा आहे. अमेरिकेत शिक्षण घेत असताना तिने एका कॉफी शॉपमध्ये पार्टटाइम काम केलं होतं. या काळात कॉफी आणि हॉट चॉकलेट बनवण्यासह कॅफेमधील विविध कामांचा अनुभव तिने घेतला. त्यामुळे कॉफीशी तिचं नातं केवळ आवडीपुरतं मर्यादित नसून त्यामागे काही खास आठवणीही जोडलेल्या आहेत.
कृती खरबंदा : कॉफीसोबत गप्पांचा आनंद
अभिनेत्री कृती खरबंदासाठी कॉफी म्हणजे केवळ एक पेय नाही, तर जवळच्या माणसांसोबत वेळ घालवण्याचं एक निमित्त आहे. मित्रमैत्रिणींसोबत कॉफी पित गप्पा मारणं तिला आवडतं. व्यस्त दिनक्रमातून काही क्षण स्वतःसाठी आणि आपल्या माणसांसाठी काढण्याचा तिचा हा खास मार्ग आहे.
अनन्या पांडे : कामाच्या मधला कॉफी ब्रेक
अभिनेत्री अनन्या पांडेच्या व्यस्त शूटिंग आणि प्रवासाच्या वेळापत्रकात कॉफीला विशेष स्थान आहे. कामाच्या दरम्यान छोटासा ब्रेक घेणं असो किंवा मित्रमैत्रिणींसोबत कॉफीवर गप्पा मारणं, या क्षणांचा ती आनंद घेते. तिच्यासाठी कॉफी हा दैनंदिन आयुष्यातील एक छोटासा पण महत्त्वाचा ब्रेक आहे.
शालिनी पांडे : कॉफी म्हणजे कम्फर्ट ड्रिंक
शालिनी पांडे कॉफीला आपलं ‘कम्फर्ट ड्रिंक’ मानते. तिला स्ट्राँग आणि ब्लॅक कॉफी आवडते. विशेष म्हणजे प्रवासादरम्यानही ती स्वतःसोबत कॉफी बीन्स आणि मोका पॉट घेऊन जाते. त्यामुळे कुठेही गेलं तरी आपल्या आवडीची कॉफी तयार करण्याचा आनंद तिला घेता येतो.
मृणाल ठाकूर : सकाळी गरम कॉफी, तर नंतर आयस्ड अमेरिकानो
अभिनेत्री मृणाल ठाकूरलाही कॉफीची विशेष आवड आहे. सकाळच्या वेळी गरम कॉफी पिणं तिला आवडतं, तर दिवस पुढे सरकल्यानंतर ती आयस्ड अमेरिकानोला पसंती देते. कॉफीसोबत काही बेक्ड पदार्थ असतील, तर तिच्यासाठी हा कॉफी ब्रेक आणखी खास बनतो.
एका कप कॉफीची प्रत्येकाची वेगळी गोष्ट!
बॉलिवूड कलाकारांच्या कॉफीच्या आवडी पाहिल्या तर प्रत्येकाची पसंती वेगळी असल्याचं लक्षात येतं. कुणाची दिवसाची सुरुवात ब्लॅक कॉफीने होते, तर कुणाला आयस्ड अमेरिकानो आवडतो. काहींसाठी कॉफी ऊर्जा देणारी असते, तर काहींसाठी ती मित्रपरिवारासोबतच्या गप्पांचं निमित्त ठरते. आंतरराष्ट्रीय कॉफी दिनानिमित्त या कलाकारांच्या कॉफीप्रेमाच्या गोष्टी जाणून घेताना एक गोष्ट नक्की लक्षात येते, ती म्हणजे एका कप कॉफीशी जोडलेल्या आठवणी आणि अनुभव प्रत्येकासाठी खास असतात!
