झाडे कोसळण्याचा धोका टाळण्यासाठी वृक्षांची नियमित निगा राखा!धोकादायक झाडे,
कमकुवत फांद्यांची माहिती तातडीने महापालिकेला द्या; मुंबईकरांना आवाहन
मुंबई: बदलते हवामान, वाढते तापमान आणि पाण्याची कमतरता यामुळे झाडांच्या आरोग्यावर परिणाम होण्याची शक्यता लक्षात घेऊन मुंबईतील नागरिक आणि गृहनिर्माण संस्थांनी वृक्षांची नियमित निगा राखावी, असे आवाहन बृहन्मुंबई महानगरपालिकेने केले आहे. झाडे आणि त्यांच्या फांद्या कोसळण्याच्या घटना रोखण्यासाठी झाडांना आवश्यकतेनुसार पाणी देण्यासह त्यांची नियमित पाहणी व देखभाल करण्याचे आवाहन प्रशासनाने केले आहे.
मुंबईतील पर्यावरणाचा समतोल राखण्यात, सावली उपलब्ध करून देण्यात आणि हवेची गुणवत्ता सुधारण्यात वृक्षांची महत्त्वाची भूमिका आहे. मात्र, बदलत्या हवामानामुळे झाडांवर ताण निर्माण होण्याची शक्यता असते. त्यामुळे झाडांचे आरोग्य टिकवून ठेवण्यासाठी नागरिकांनी आणि गृहनिर्माण संस्थांच्या व्यवस्थापन समित्यांनी पुढाकार घेणे आवश्यक असल्याचे महापालिकेने स्पष्ट केले आहे.
पिण्याच्या पाण्याऐवजी पुनर्वापरयोग्य पाण्याला प्राधान्य
झाडांना पाणी देताना पिण्याच्या पाण्याचा वापर शक्यतो टाळावा. त्याऐवजी सांडपाणी प्रक्रिया प्रकल्पातून प्रक्रिया केलेले, झाडांसाठी योग्य आणि सुरक्षित असलेल्या पुनर्वापरयोग्य पाण्याचा वापर करावा, असे आवाहन करण्यात आले आहे. घरगुती वापरानंतर उपलब्ध होणारे इतर योग्य पाणीही आवश्यक ती काळजी घेऊन झाडांसाठी वापरता येऊ शकते.
गृहनिर्माण संस्थांनी आपल्या आवारातील झाडांची संख्या, त्यांची स्थिती आणि पाण्याची गरज लक्षात घेऊन पाणी देण्याचे नियोजन करावे. पाण्याचा अपव्यय टाळून उपलब्ध पाण्याचा योग्य वापर केल्यास जलसंधारणासोबतच वृक्षांचे आरोग्य राखण्यास मदत होऊ शकते.
झाडांवरील धोक्याची चिन्हे ओळखा
झाडे किंवा त्यांच्या फांद्या कोसळण्याच्या घटना टाळण्यासाठी केवळ पाणी देणे पुरेसे नसून झाडांची नियमित पाहणी आणि योग्य देखभाल करणेही गरजेचे आहे. झाडाच्या बुंध्याला भेगा पडणे, झाड एका बाजूला झुकणे, मोठ्या फांद्या सुकणे किंवा तुटण्याच्या स्थितीत असणे आणि मुळे उघडी पडणे यांसारखी लक्षणे आढळल्यास नागरिकांनी दुर्लक्ष करू नये.
अशा संभाव्य धोकादायक झाडांची तसेच कमकुवत फांद्यांची माहिती तातडीने बृहन्मुंबई महानगरपालिकेला कळवावी, असे आवाहन प्रशासनाने केले आहे. वेळेत माहिती दिल्यास आवश्यक तपासणी आणि योग्य ती कार्यवाही करण्यास मदत होऊ शकते.
