Drishyam 3 Movie Review : 23 जुलैला नेमकं काय घडलं? ‘दृश्यम 3’ पाहण्याआधी वाचा रिव्ह्यू
पंकज राणे
मुंबई : विजय साळगावकर आणि त्याच्या कुटुंबाची ‘२ ऑक्टोबर’ची कहाणी आता प्रेक्षकांच्या चांगलीच परिचयाची झाली आहे. ‘दृश्यम’ आणि ‘दृश्यम 2’नंतर या लोकप्रिय फ्रँचायझीचा शेवटचा अध्याय ‘दृश्यम: द कन्क्लूजन’ प्रेक्षकांच्या भेटीला आला आहे. विजय साळगावकर पुन्हा एकदा संकटात सापडतो आणि यावेळी त्याच्यासमोर आहे क्राइम ब्रँचचा अधिकारी राजवीर सिंह तोमर. त्यामुळे विजय पुन्हा एकदा पोलिसांना चकवा देणार की यावेळी त्याचा डाव उलटणार, याची उत्सुकता सुरुवातीपासूनच कायम राहते.
कथा नेमकी काय आहे?
सॅम देशमुखच्या मृत्यूचं ओझं अजूनही मीराच्या मनावर आहे. सूड, अपराधगंड आणि असहायतेतून ती पुन्हा एकदा हे प्रकरण उघडते. यामुळे विजय साळगावकरच्या आयुष्यात पुन्हा संकटं निर्माण होतात.यावेळी तपासाची धुरा क्राइम ब्रँचचा अधिकारी राजवीर सिंह तोमर सांभाळतो. विजयची शांत आणि चाणाक्ष बुद्धी एका बाजूला, तर राजवीरचा आक्रमक तपास दुसऱ्या बाजूला, असा बुद्धिबळाचा डाव संपूर्ण चित्रपटात पाहायला मिळतो.तपासातील नवे धागेदोरे, जुन्या साक्षीदारांचं पुनरागमन आणि न्यायालयीन संघर्ष यामुळे कथा सातत्याने पुढे सरकत राहते. प्रत्येक टप्प्यावर नवी माहिती आणि ट्विस्ट समोर येत असल्याने पुढे नेमकं काय होणार, याची उत्सुकता कायम राहते.
अजय देवगणचा दमदार अभिनय
विजय साळगावकरच्या भूमिकेत अजय देवगण पुन्हा एकदा प्रभाव पाडतो. या चित्रपटात त्याचे संवाद तुलनेनं कमी आहेत; मात्र त्याची शांतता आणि डोळ्यांतून होणारा अभिनय विशेष लक्षात राहतो.चेहऱ्यावरची शांतता, डोळ्यांमधली अस्वस्थता आणि परिस्थितीवर नियंत्रण ठेवण्याचा प्रयत्न अजय देवगणने अत्यंत संयमानं साकारला आहे. विजयच्या मनात नेमकं काय सुरू आहे, हे त्याच्या देहबोलीतून जाणवत राहतं.जयदीप अहलावतने साकारलेला राजवीर सिंह तोमर हा विजयला तोडीस तोड प्रतिस्पर्धी ठरतो. पडद्यावर त्याची उपस्थितीच वातावरणात तणाव निर्माण करते. अजय देवगण आणि जयदीप अहलावत यांच्यातील संघर्ष चित्रपटाला वेगळीच उंची देतो.तब्बूने मीराच्या वेदना आणि सूडभावना प्रभावीपणे साकारल्या आहेत. प्रकाश राज यांच्या वकिलाच्या भूमिकेला कोर्टरूम सीन्समध्ये चांगलं वजन मिळतं. तर कमलेश सावंतचा गायतोंडे गंभीर वातावरणातही हलकेफुलके क्षण निर्माण करतो.
दिग्दर्शन आणि पटकथा
‘दृश्यम’ आणि ‘दृश्यम 2’च्या यशानंतर या फ्रँचायझीचा शेवट करणं दिग्दर्शक अभिषेक पाठक यांच्यासमोर मोठं आव्हान होतं. त्यांनी ही जबाबदारी बऱ्यापैकी प्रभावीपणे पेलली आहे.पटकथा प्रेक्षकांना सतत पुढे खेचत राहते. विजय आणि राजवीरमधील संघर्ष, तपासातील नवे धागेदोरे आणि कोर्टरूम ड्रामा यामुळे चित्रपटाची पकड कायम राहते.मात्र काही ठिकाणी कथा थोडी घाईने पुढे गेल्यासारखी वाटते. काही घटनांमागचं नियोजन स्वीकारण्यासाठी प्रेक्षकांना तर्क थोडा बाजूला ठेवावा लागतो. तसेच नंदिनी, अंजू आणि अनु या साळगावकर कुटुंबातील व्यक्तिरेखांना यावेळी आधीच्या भागांच्या तुलनेत कमी भावनिक वाव मिळतो.
पार्श्वसंगीत आणि कॅमेरावर्क
चित्रपटाच्या थरारामध्ये पार्श्वसंगीताची महत्त्वाची भूमिका आहे. तणावपूर्ण प्रसंग अधिक प्रभावी करण्याचं काम संगीत आणि साउंड डिझाइन करतात.कॅमेरावर्कमधूनही चित्रपटाचा गडद आणि गंभीर मूड प्रभावीपणे उभा राहतो. विशेषतः क्लोजअप शॉट्सचा वापर विजय आणि राजवीरच्या व्यक्तिरेखांना अधिक प्रभावी बनवतो.
कमतरता काय?
चित्रपटाचा रनटाइम काही ठिकाणी थोडा जास्त जाणवतो. काही प्रसंगांमध्ये सिनेमॅटिक लिबर्टी घेतल्याचं जाणवतं. तसेच आधीच्या दोन भागांमध्ये विजयच्या कुटुंबाचा भावनिक पैलू ज्या ताकदीने दाखवण्यात आला होता, त्याची तीव्रता या भागात तुलनेनं कमी आहे.तरीही हे सगळं बाजूला ठेवलं, तर चित्रपटातील थरार आणि सतत येणारे ट्विस्ट्स प्रेक्षकांना शेवटपर्यंत गुंतवून ठेवतात.
शेवटचा अध्याय कसा आहे?
‘दृश्यम: द कन्क्लूजन’ हा परिपूर्ण चित्रपट नसला, तरी लोकप्रिय फ्रँचायझीला समाधानकारक शेवट देण्याचा प्रयत्न तो नक्कीच करतो. दमदार अभिनय, विजय आणि राजवीरमधील बुद्धीचा खेळ, कोर्टरूम ड्रामा आणि शेवटपर्यंत टिकणारा सस्पेन्स यामुळे हा चित्रपट थ्रिलरप्रेमींसाठी पाहण्यासारखा ठरतो.शेवटी रहस्याचा खेळ संपतो… पण विजय साळगावकरच्या चेहऱ्यावरचं ते शांत आणि चाणाक्ष स्मित मात्र प्रेक्षकांच्या मनात बराच काळ रेंगाळत राहतं.मुंबई समाचार मराठीकडून ‘दृश्यम: द कन्क्लूजन’ला पाचपैकी चार स्टार!
