प्रशांत गोडसे
मुंबई: नेहमी आलिशान गाडीतून फिरणारा, कोट्यवधींच्या संपत्तीचा मालक आणि मतदारसंघाचा आमदार अचानक घाटकोपरच्या रस्त्यावर भिकारी म्हणून उभा राहिला तर? समोरून जाणाऱ्या नागरिकांना तो आमदार असल्याची कल्पनाही येणार नाही. घाटकोपर पूर्वचे आमदार पराग शहा यांनी असाच काहीसा अनोखा प्रयोग केला असून, त्यांचा भिकाऱ्याच्या वेशातील व्हिडीओ सध्या सोशल मीडियावर चर्चेचा विषय ठरत आहे.
पराग शहा हे मुंबईतील प्रमुख आणि संपन्न राजकारण्यांपैकी एक म्हणून ओळखले जातात. कोट्यवधी रुपयांची संपत्ती असलेल्या शहा यांनी नुकताच वेषांतर करून घाटकोपरच्या रस्त्यांवर भिकारी म्हणून एक दिवस घालवला. विशेष म्हणजे, या काळात अनेकांना ते पराग शहा आहेत, याची कल्पनाही आली नाही.
शहा यांनी साधे कपडे परिधान करून तसेच आपला चेहरा आणि एकूणच देखावा बदलून हा प्रयोग केला. त्यानंतर ते घाटकोपरमधील गर्दीच्या रस्त्यांवर फिरले. सामान्य नागरिक भिकाऱ्यांकडे कशा नजरेने पाहतात, कोण मदत करतो, कोण दुर्लक्ष करतो आणि कोण नकार देतो, याचा त्यांनी प्रत्यक्ष अनुभव घेतला.
गुरूंच्या आज्ञेने घेतला अनुभव
पराग शहा यांनी हा प्रयोग आपल्या गुरूंच्या आज्ञेनुसार केल्याचे सांगितले जात आहे. केवळ राजकीय प्रसिद्धीसाठी नव्हे, तर सामान्य माणसाचे आयुष्य आणि त्याच्या अडचणी अधिक जवळून समजून घेण्याचा हा प्रयत्न असल्याचे मानले जात आहे.
घाटकोपरच्या रस्त्यांवर भिकारी म्हणून वावरताना शहा यांना नागरिकांच्या विविध प्रतिक्रिया अनुभवायला मिळाल्या. काहींनी मदत केली, काहींनी त्यांच्याकडे दुर्लक्ष केले, तर काही जण न पाहताच पुढे निघून गेले. समाजातील दुर्बल घटकांकडे पाहण्याचा दृष्टिकोनही या प्रयोगातून अनुभवता आला.
‘आमदार’ म्हणून नव्हे, तर सामान्य माणूस म्हणून अनुभव
राजकारणात असताना नागरिकांच्या समस्या ऐकणे आणि त्या समस्या प्रत्यक्ष अनुभवणे यात मोठा फरक असतो. त्यामुळे एका दिवसासाठी का होईना, आमदारपदाची ओळख बाजूला ठेवून सामान्य नागरिकांच्या नजरेतून मतदारसंघ अनुभवण्याचा शहांचा हा प्रयत्न लक्षवेधी ठरला आहे.
भिकाऱ्याच्या वेशातील पराग शहा यांना रस्त्यावरून जाणाऱ्या बहुतांश नागरिकांनी ओळखले नाही. त्यामुळे कोट्यवधींची संपत्ती आणि आमदारपदाची ओळख बाजूला ठेवल्यानंतर एखाद्या व्यक्तीकडे समाज कसा पाहतो, याचा वेगळा अनुभव त्यांना या प्रयोगातून मिळाला.
दरम्यान, शहांचा हा व्हिडीओ सोशल मीडियावर व्हायरल झाल्यानंतर त्यांच्या या प्रयोगाची चर्चा सुरू झाली आहे. काही जण या उपक्रमाचे कौतुक करत आहेत, तर काही जण त्यामागील उद्देशावर प्रश्न उपस्थित करत आहेत. मात्र, कोट्यवधींचा मालक असलेला आमदार एका दिवसासाठी भिकारी बनून रस्त्यावर उतरला, हा प्रसंग निश्चितच वेगळा आणि चर्चेचा ठरला आहे.
