साहिल वाकोडे प्रकरणानंतर IIT मुंबईत फॅन बदलण्याची चर्चा; प्रशासनाची वेगळी भूमिका

मुंबई : आयआयटी मुंबईच्या पवई कॅम्पसमधील हॉस्टेलमध्ये २२ वर्षीय विद्यार्थी साहिल वाकोडे याचा १८ सप्टेंबर रोजी मृत्यू झाल्यानंतर परिसरात विविध प्रश्न उपस्थित झाले आहेत. साहिलला जातीयवाचक उल्लेख करून त्रास दिला जात असल्याचा आरोप त्याच्या पालकांनी केल्यानंतर या प्रकरणाचा पोलिसांकडून तपास सुरू आहे. त्याचवेळी विद्यार्थी आणि प्राध्यापकांवरील निलंबनाच्या कारवाईवरूनही आयआयटीमध्ये मतभेद निर्माण झाल्याचे चित्र आहे.

या पार्श्वभूमीवर हॉस्टेलमधील सीलिंग फॅन हटवून त्याऐवजी वॉल-माउंटेड फॅन बसविण्याची प्रक्रिया सुरू असल्याची चर्चा सोशल मीडियावर सुरू झाली आहे. साहिलच्या मृत्यूनंतर प्रशासनाने हा निर्णय घेतल्याचा दावा काही पोस्ट आणि व्हिडीओमधून केला जात आहे. मात्र, या दाव्याबाबत आयआयटी मुंबई प्रशासनाची भूमिका वेगळी आहे.

फॅन बदलण्याची प्रक्रिया सुरू?
मिळालेल्या माहितीनुसार, आयआयटी मुंबईच्या हॉस्टेलमधील सीलिंग फॅन बदलण्याचा मुद्दा काही काळापासून प्रशासनाच्या विचाराधीन होता. हॉस्टेलच्या नूतनीकरणाच्या कामाचा भाग म्हणून सीलिंग फॅनऐवजी वॉल-माउंटेड फॅन बसविण्याचा निर्णय घेण्यात आल्याचे प्रशासनाकडून सांगण्यात येत आहे.

ही प्रक्रिया सुमारे दोन महिन्यांपासून विचाराधीन होती आणि त्यानंतर त्यावर निर्णय घेण्यात आल्याची माहिती समोर आली आहे. पहिल्या टप्प्यातील काही वॉल-माउंटेड फॅन कॅम्पसमध्ये दाखल झाल्याचेही सूत्रांकडून सांगण्यात आले आहे.

सोशल मीडियावरील दाव्यांवर प्रश्नचिन्ह
साहिलच्या मृत्यूनंतर हॉस्टेलमधील फॅन बदलले जाणार असल्याचा दावा करणारे काही फोटो आणि व्हिडीओ सोशल मीडियावर प्रसारित झाले. मात्र, या फोटोंमधील फॅन आयआयटी मुंबईच्या पवई कॅम्पसमधीलच आहेत का, याबाबत त्यावेळी स्पष्टता नव्हती.

त्यामुळे सोशल मीडियावरील दावे आणि प्रशासनाची अधिकृत भूमिका यामध्ये फरक असल्याचे दिसून येत आहे.

प्रशासन म्हणते, निर्णयाचा आत्महत्येशी संबंध नाही
आयआयटी मुंबईच्या अधिकाऱ्यांच्या म्हणण्यानुसार, फॅन बदलण्याची प्रक्रिया ही हॉस्टेलमधील व्यापक नूतनीकरणाचा भाग आहे. विद्यार्थ्यांच्या अलीकडील आत्महत्यांच्या घटनांनंतरच हा निर्णय घेण्यात आला, असे सांगणे योग्य ठरणार नाही, अशी प्रशासनाची भूमिका आहे.

त्यामुळे ‘साहिल वाकोडे यांच्या मृत्यूनंतरच आयआयटी प्रशासनाने सीलिंग फॅन हटविण्याचा निर्णय घेतला’ असा थेट निष्कर्ष काढणे दिशाभूल करणारे ठरू शकते. दरम्यान, साहिल वाकोडे प्रकरणातील पोलिस तपास सुरू असून त्यातून पुढे कोणती माहिती समोर येते, याकडेही लक्ष लागले आहे.