मध्य रेल्वेचे भाडेव्यतिरिक्त उत्पन्न ५८ कोटींवर
गतवर्षाच्या तुलनेत १३.६७ टक्के वाढ; ऑगस्टमध्ये ई-लिलावातून ३६ कंत्राटे
मुंबई : मध्य रेल्वेने ऑगस्ट २०२६ अखेरपर्यंत भाडेव्यतिरिक्त उत्पन्नातून ५८.१५ कोटी रुपयांचा महसूल मिळवला आहे. गेल्या वर्षी याच कालावधीत मिळालेल्या ५१.१६ कोटी रुपयांच्या तुलनेत यंदा उत्पन्नात १३.६७ टक्क्यांची वाढ झाली आहे. रेल्वेच्या मालमत्तेचा व्यावसायिक वापर, जाहिराती, प्रवाशांसाठी विविध सेवा आणि अन्य उत्पन्नवर्धक उपक्रमांमुळे ही वाढ झाली आहे.
ऑगस्ट महिन्यात मध्य रेल्वेने ई-लिलावाद्वारे ३६ कंत्राटे मंजूर केली. त्यातून वार्षिक ३२४.०३ लाख रुपयांचे परवाना शुल्क मिळणार आहे. ई-लिलावामुळे कंत्राट देण्याची प्रक्रिया अधिक पारदर्शक आणि स्पर्धात्मक होत असल्याचे मध्य रेल्वेने म्हटले आहे.
मुंबई विभागाने जाहिराती आणि प्रवाशांसाठीच्या विविध सेवांमधून महसूल मिळवला. कामण रोड-जुचंद्र दरम्यान ‘आउट ऑफ होम’ जाहिरात स्थळे, चिंचपोकळी, नेरळ, ठाकुर्ली, आटगाव, मस्जिद आणि डॉकयार्ड रोड स्थानकांवरील जाहिरात अधिकार तसेच पनवेल येथील ‘पोर्टर ऑन कॉल’ सेवेचा यामध्ये समावेश आहे. कल्याण-कर्जत/खोपोली आणि कल्याण-कसारा मार्गावरील उपनगरीय गाड्यांमध्ये खाद्यपदार्थ विक्रीचे कंत्राट दरवर्षी ४०.११ लाख रुपये या दराने देण्यात आले आहे.
भुसावळ विभागाने १३ मेमू रेक्समधील ऑडिओ जाहिराती, अकोला येथील दुचाकी पार्किंग, प्रवासी डॉर्मिटरी, रिटायरिंग रूम, किराणा दुकान आणि डिजी लॉकर सेवांच्या माध्यमातून उत्पन्न वाढवले. पुणे विभागाने जुना बाजार चौक येथील ‘आउट ऑफ होम’ जाहिरातीचे कंत्राट दरवर्षी ३६ लाख रुपये या दराने दिले.
सोलापूर विभागाने वाडी यार्ड येथे रिकाम्या बीओएक्सएन/बीओएक्सएनएचएल रेक्स व वॅगन्सच्या साफसफाईतून दरवर्षी १०० लाख रुपये, तर साईनगर शिर्डी येथील नॉन-डिजिटल जाहिरातींतून दरवर्षी ३६ लाख रुपये मिळवण्याची व्यवस्था केली आहे. सोलापूर व पंढरपूर स्थानकांवर डिजिटल जाहिराती, किओस्क, डिजी लॉकर आणि मोबाईल चार्जिंग सुविधांचाही समावेश आहे.
नागपूर विभागाने मोबाईल फूड व्हॅन्स, गाड्यांमधील विविध विक्री सेवा, डिजी लॉकर आणि कर्मचारी कॅन्टीनच्या कंत्राटांतून महसूल मिळवला. रेल्वेच्या मालमत्तेचा अधिकाधिक वापर करून महसुलाचे नवे स्रोत निर्माण करण्याबरोबरच प्रवाशांना अतिरिक्त सुविधा उपलब्ध करून देण्यावर मध्य रेल्वेचा भर असल्याचे प्रसिद्धीपत्रकात नमूद करण्यात आले आहे.
