राष्ट्रीय पुरस्कार विजेता आदिनाथ कोठारे दोन बिग-बजेट बॉलिवूड चित्रपटांसह प्रेक्षकांच्या भेटीला!

‘रामायण’ आणि ‘नयी नवेली’ या दोन मोठ्या चित्रपटांत महत्त्वपूर्ण भूमिका; बॉलिवूडमध्ये आदिनाथ कोठारेंची दमदार वाटचाल!

राष्ट्रीय पुरस्कार विजेते अभिनेते आदिनाथ कोठारे आता आपल्या कारकिर्दीतील महत्त्वाच्या टप्प्यावर पोहोचले आहेत. मराठी मनोरंजनसृष्टीत आपल्या अभिनयाचा ठसा उमटवल्यानंतर ते आता दोन मोठ्या बजेटच्या बॉलिवूड चित्रपटांमधून प्रेक्षकांच्या भेटीला येण्यासाठी सज्ज झाले आहेत. विशेष म्हणजे, या दोन्ही चित्रपटांचे दिग्दर्शन वेगवेगळी शैली आणि स्वतंत्र दृष्टिकोन असलेल्या दिग्दर्शकांनी केले आहे.

आदिनाथ कोठारे हे दंगलफेम दिग्दर्शक नितेश तिवारी यांच्या महत्त्वाकांक्षी ‘रामायण’ या भव्य चित्रपटात झळकणार आहेत. त्याचबरोबर, बालाजी मोहन दिग्दर्शित ‘नयी नवेली’ या अनोख्या संकल्पनेवर आधारित मनोरंजक चित्रपटातही ते महत्त्वपूर्ण भूमिका साकारणार आहेत. या दोन्ही चित्रपटांमुळे आदिनाथ यांच्या अभिनयातील विविध पैलू प्रेक्षकांना अनुभवता येणार आहेत.

या दोन्ही चित्रपटांचं वैशिष्ट्य म्हणजे त्यामागे असलेले दोन दिग्दर्शक आणि त्यांची वेगळी कार्यशैली. वैविध्यपूर्ण विषयांना आपल्या खास शैलीतून पडद्यावर साकारणाऱ्या या दिग्दर्शकांसोबत काम करताना आदिनाथ यांना अभिनयाच्या नव्या संधी मिळाल्या. दोन्ही चित्रपटांच्या भव्यतेसोबतच त्यातील भावनिक आणि कलात्मक पैलू जपण्याचा अनुभव त्यांच्यासाठी महत्त्वाचा ठरला.

या अनुभवाविषयी बोलताना आदिनाथ कोठारे म्हणाले, “बालाजी मोहन आणि नितेश तिवारी या दोन दिग्गज दिग्दर्शकांसोबत काम करणं हा माझ्यासाठी एका मोठ्या मास्टरक्लाससारखा अनुभव होता. बालाजी सर फँटसी, कॉमेडी, अ‍ॅक्शन आणि मोठ्या कलाकारांच्या फळीला अत्यंत शांतपणे आणि सहजतेने एका सूत्रात बांधतात. सेटवरचा त्यांचा संयम थक्क करणारा असतो. तर दुसरीकडे, नितेश सरांचं व्हिजन अथांग आणि भव्य आहे. महाकाय कॅनव्हासवर काम करतानाही ते भावनिक बारकावे आणि अचूक नियोजन कधीही सुटू देत नाहीत. एवढ्या मोठ्या स्केलचा चित्रपट साकारताना स्वतःची दृष्टी पूर्णपणे स्पष्ट ठेवणं आणि कलाकाराला विश्वास देणं, ही या दोन्ही दिग्दर्शकांची सर्वात मोठी ताकद आहे.”

राष्ट्रीय पुरस्कारापासून ते आता मोठ्या बॉलिवूड चित्रपटांमधील महत्त्वपूर्ण भूमिकांपर्यंतचा आदिनाथ यांचा प्रवास त्यांच्या अभिनयातील सातत्य, मेहनत आणि वैविध्यपूर्ण भूमिका साकारण्याच्या क्षमतेची साक्ष देतो. वेगवेगळ्या धाटणीच्या कथांमध्ये स्वतःला सिद्ध करण्याची त्यांची तयारी त्यांच्या कारकिर्दीला नवी दिशा देत आहे.

‘नयी नवेली’ हा चित्रपट १६ ऑक्टोबरला, तर ‘रामायण’ हा चित्रपट ५ नोव्हेंबरला प्रदर्शित होणार असल्याचे नमूद करण्यात आले आहे. या दोन चित्रपटांच्या माध्यमातून आदिनाथ कोठारे बॉलिवूडमध्ये आपली वेगळी ओळख अधिक ठळक करण्यासाठी सज्ज झाले आहेत.