ठाण्यात शिवसेना नेते पूर्णेकर हत्या प्रकरण: ‘या तो अध्याय समाप्त…’, शेवटचं व्हॉट्सॲप स्टेटस व्हायरल; ठाण्यात खळबळ!
ठाणे: मुंबईजवळील ठाण्यातील मानपाडा परिसरात शिवसेना (उद्धव बाळासाहेब ठाकरे) पक्षाचे उपविभागप्रमुख प्रदीप पूर्णेकर यांची त्यांच्याच कार्यालयात घुसून गोळ्या झाडून निर्घृण हत्या करण्यात आल्याने राजकीय वर्तुळात मोठी खळबळ उडाली आहे. मंगळवारी रात्री घडलेल्या या थरारक घटनेत गंभीर जखमी झालेल्या पूर्णेकर यांना रुग्णालयात नेण्यापूर्वीच त्यांचा मृत्यू झाला. या हत्याकांडानंतर ठाण्यात ठाकरे गट आणि शिंदे गट यांच्यात प्रचंड राजकीय तणाव निर्माण झाला आहे. या संपूर्ण घटनेदरम्यान प्रदीप पूर्णेकर यांचे शेवटचे व्हॉट्सॲप आणि इन्स्टाग्राम स्टेटस सध्या सोशल मीडियावर जोरदार चर्चेत आले असून त्यावरून अनेक तर्कवितर्क लावले जात आहेत.
शेवटच्या व्हॉट्सॲप स्टेटसमध्ये नेमके काय होते?
हत्येच्या अवघ्या काही तासांआधी पूर्णेकर यांनी सोशल मीडियावर एक व्हिडिओ स्टेटस शेअर केला होता. या व्हिडिओमध्ये त्यांच्या फोटोच्या पार्श्वभूमीवर एक हिंदी ऑडिओ क्लिप वाजत होती.
“एक बडा दाव खेलना है इस बार! ज्यादा से ज्यादा क्या होगा, या तो अपना अध्याय समाप्त, या फिर एक नया अध्याय का प्रारंभ.”
(यावेळी एक मोठा डाव खेळायचा आहे! जास्तीत जास्त काय होईल, एकतर आपला अध्याय संपेल किंवा मग एका नव्या अध्यायाची सुरुवात होईल.)
हे स्टेटस समोर आल्यानंतर राजकीय आणि सामाजिक वर्तुळात विविध चर्चांना उधाण आले आहे. पूर्णेकर यांना आपल्यावर हल्ला होण्याची किंवा जिवाला धोका असल्याची आधीच कुणकुण लागली होती का? की ते एखाद्या मोठ्या प्रकरणाचा पर्दाफाश करणार होते? पोलीस आता या गूढ स्टेटसच्या दिशेनेही तपास करत आहेत.
ठाणे पोलिसांनी या प्रकरणात तात्काळ कारवाई करत एका महिलेसह दोन संशयितांना अटक केली आहे. या प्रकरणातील मुख्य आरोपी पप्या शिंदे सध्या पोलीस कोठडीत असून न्यायालयाने त्याला पोलीस कोठडी सुनावली आहे. जुने वैमनस्य, गँगवॉर आणि राजकीय वैर या सर्व बाजू पडताळून पोलीस आरोपींची कसून चौकशी करत आहेत.
शिवसेना (UBT) खासदार संजय राऊत यांनी या हत्येमागे ठाण्याच्या माजी महापौर मीनाक्षी शिंदे आणि त्यांच्या पतीचा हात असल्याचा गंभीर आरोप केला आहे. राऊत यांनी दावा केला की, प्रदीप पूर्णेकर यांनी परिसरातील ड्रग्ज माफिया आणि बेकायदेशीर क्लस्टर डेव्हलपमेंटविरोधात आवाज उठवला होता. राऊत म्हणाले, “ठाण्याची परिस्थिती आता बिहार आणि बीडपेक्षाही भीषण झाली आहे. महाराष्ट्राचे गृहमंत्री कायदा व सुव्यवस्था राखण्यात पूर्णपणे अपयशी ठरले आहेत.” दुसरीकडे, माजी महापौर मीनाक्षी शिंदे यांनी आपल्यावरील हे सर्व आरोप पूर्णपणे फेटाळून लावले आहेत.
पक्षाचे प्रमुख उद्धव ठाकरे यांनी विभागप्रमुखांच्या बैठकीत या घटनेचा तीव्र निषेध केला. “ठाण्यात गुंडगिरी आणि दडपशाही सुरू आहे. मात्र, ही दादागिरी जास्त काळ चालणार नाही, आम्ही त्याला चोख प्रत्युत्तर देऊ. शिवसेना पक्ष प्रदीप पूर्णेकर यांच्या कुटुंबीयांच्या पाठीशी खंबीरपणे उभा राहील,” असा इशारा उद्धव ठाकरे यांनी दिला.
